- Yield: 12 ժամ անց
- Prep Time: 45 minutes
- Cook Time: 20-30 minutes
Շոկոլադե տորթ սրճային համով
Բաղադրիչներ
- Խմորի համար՝
- ձու - 6 հատ
- շաքարավազ - 220 գր
- ալյուր - 80 գր
- օսլա (крахмал) - 50 գր (կարտոֆիլի)
- կակաո - 30 գր
- փխրեցուցիչ - 1 թ/գդ
- վանիլին - 1/2 թ/գդ
- Կրեմի համար՝
- սերուցք 30-35% յուղայնությամբ - 500 գր
- թթվասեր - 250 գր
- շաքարավազ - 170 գր
- վանիլին - 1/2 թ/գդ
- շոկոլադ սև - 100 գր
- Օշարակի համար՝
- ջուր - 300 մլ
- սուրճ սև - 3 թ/գդ (լիքը գդալ)
- շաքարավազ - 6 թ/գդ
Քայլերի հաջորդականություն
- Ձվերի սպիտակուցները դեղնուցներից առանձնացնում ենք։
Սպիտակուցները մեծ ամանի մեջ ենք լցնում և 7-12 րոպե լավ հարում ենք`
աստիճանաբար ավելացնելով շաքարավազի կեսը։ Հարում ենք այնքան մինչև միջին
պնդության դառնա։
- Դեղնուցները մեկ այլ ամանի մեջ տրորում ենք` աստիճանաբար ավելացնելով շաքարավազի մյուս կեսն ու վանիլինը։
Հարում ենք այնքան, մինչև զանգվածը մի քանի անգամ ավելանա և սպիտակի։
- Դեղնուցները ավելացնում ենք սպիտակուցներով զանգվածին` զգուշորեն վերից վար
շարժումներով թիակով խառնելով։
- Ալյուրը, օսլան, վանիլինը, կակաոն և փխրեցուցիչը միասին մաղում ենք։
Չոր խառնուրդը մաս առ մաս ավելացնում ենք ձվերով զանգվածին `զգուշորեն վերից վար շարժումներով թիակով խառնելով։
Դա հարկավոր է զգույշ անել, որպեսզի զանգվածը չնստի։
- Տապակը (38x30 չափի) յուղաթղթով պատում ենք այնպես, որ եզրերն էլ ծածկվեն
(եթե յուղաթուղթը նեղ է 2 հատ ենք դնում)։ Խմորը լցնում ենք և զգուշորեն հավասարեցնում։
Տեղափոխում ենք մինչև 180 աստիճան տաքացրած ջեռոցի մեջ և 20-30 րոպե թխում
ենք, փայտիկով փորձում ենք, եթե այն խմորի միջից չոր է դուրս գալիս, ուրեմն
պատրաստ է։
- Պատրաստի բիսկվիթն ամբողջությամբ սառեցնում ենք, ցանկալի է ամբողջ գիշերը կամ մի քանի ժամով թողնել։
- Այնուհետև շրջում ենք, յուղաթուղթը հանում ենք։
Այնուհետև շրջում ենք նոր յուղաթղթով պատված տապակի մեջ (բիսկվիթը պետք է 3 հավասար քառակուսիների բաժանել):
- Բիսկվիթը լայն կողմով դեպի մեզ ենք դարձնում։
Բիսկվիթի լայնությունը չափում ենք և ուղիղ մեջտեղից ուղղահայաց կտրում ենք
(լայնությունը 38 սմ էր, կիսելու հետո 19 սմ-անոց 2 կտոր ենք ստանում)։
Վերևից չափում ենք 19 սմ և հորիզոնական գծով կտրում ենք։ Ստացանք 2 հատ
19x19 չափի քառակուսի։
- Այժմ ներքևից 9,5 սմ-անոց 2 հատ շերտ ենք կտրում, որոնք միասին երրորդ
քառակուսին կլինեն (19։2=9.5 սմ)։
- Այդ երկուսը միասին տորթի մյուս կտորն են կազմում։
Տապակում մնացած փշրանքները հենց տապակի մեջ փշրում ենք։
- Այսպես, ունենք 3 հատ քառակուսի և տորթի համար փշրանք։
- Օշարակի համար սուրճը եփում ենք, ավելացնում շաքարավազն ու ամբողջությամբ
սառեցնում (լավ կլինի դա նախապես անել, որպեսզի սուրճը հասցնի սառչել)։
Շոկոլադը մեծ քերիչով անցկացնում ենք։
- Պատրաստում ենք կրեմը։
Սերուցքը հարում ենք մինչև փրփրի` աստիճանաբար ավելացնելով շաքարավազն ու
վանիլինը։
- Այնուհետև ավելացնում ենք թթվասերը և թիակով զգուշորեն վերից վար շարժումներով խառնում ենք։
- Սկսում ենք տորթը հավաքել։
Առաջին շերտը դնում ենք ամանի վրա (հակառակ երեսով դեպի վերև)։
Այժմ վերցնում ենք դեղատնից գնված սովորական մեծ ներարկիչ, օշարակը լցնում ենք
մեջը և բարակ շիթով լցնում շերտի վրա։ Մեկ շերտի համար 100 մլ օշարակ է պետք,
որպեսզի այն ամբողջությամբ փափկի։ Այս մեթոդով տորթը շատ արագ կներծծվի` 3-4
ժամում։
Կարող ենք գդալով անել, կամ այնպես ինչպես հարմար է։
- Ներծծված շերտի վրա ենք լցնում կրեմի 1/3 մասն ու հավասարեցնում ենք։
- Վրան ենք լցնում քերած շոկոլադի 1/3 մասը։
- Այնուհետև դնում ենք երկրորդ շերտը (այն շերտը, որը երկու մասից է բաղկացած)։
100 մլ օշարակով փափկեցնում ենք։
Վրան ենք լցնում կրեմը, այնուհետև քերած շոկոլադը։
- Այնուհետև դնում ենք երրորդ շերտը, 100 մլ սրճային օշարակով հանգամանորեն
փափկեցնում ենք։
Շերտի վրա ենք լցնում մնացած կրեմը, կողքերով տարածում ենք և հավասարեցնում ։
- Վրան ենք լցնում մնացած շոկոլադը։
- Տորթի կողքերին տորթի փշրանքն ենք լցնում։
Ահա այսպիսի քառակուսաձև ոչ ստանդարտ և բարձր տորթ է ստացվում։
3-4 ժամով տեղափոխում ենք սառնարանը, որպեսզի այն լավ փափկի (լավ կլինի գիշերը սառնարանում թողնել)։
- Ահա և ախորժելի տորթի կտորը։
Հուսով ենք կհավանեք։
Շոկոլադե տորթ սրճային համով 🙂
Այսպիսի տորթի բաղադրատոմս ունենալով, կարող եք ժամանակ առ ժամանակ պատրաստել այն` ուրախացնելով Ձեր սիրելիներին 🙂
Ձեզ կարող է հետաքրքրել նաև
Թողնել պատասխան
Մուտք եղեք:
Alyur@ 80 gram mek bajak aysinqn?
Անի ջան, 80 գրամ ալյուրը կես բաժակ է ստացվում 🙂